今年2019年嘅12月26日除咗係Boxing Day之外，同時亦都係發生日偏食嘅日子！本身呢次日食其實係日環食嚟嘅，但係因為香港處於半影區，所以只能夠睇到日偏食－咁啫係點呢？
首先要講吓日食嘅成因：當月球行到地球同太陽之間，成為一條直線嘅時候，月球係地球上面睇就會遮住咗全個或者一部分嘅太陽。地球因應同月球唔同嘅距離，就會喺本影區發生日環食或者日全食，而地球其他落喺半影區嘅地方因角度問題會見到唔同程度嘅日偏食。
😋 正如開頭提到，今次嘅日食係日環食嚟嘅，佢嘅本影投影區落喺菲律賓、印尼、印度、中東等嘅地區，而香港因為座落喺半影區，見到嘅只係日偏食。香港見到食甚（太陽被掩蓋得最多嘅時候）係喺下晝1點55分，到時大約34%嘅太陽會被月球掩蓋。初虧（月球個影啱啱開始掂到太陽）開始，到復圓（月球影子完全離開太陽表面），整個日偏食過程總共歷時大約3個鐘。右圖為詳細時間表。
😎 咁我哋可以點樣觀賞日食呢？首先：絕對絕對唔可以用肉眼／只戴太陽眼鏡直視太陽！！！！！！！！！
（編按：人一生有兩次機會直視太陽🙃）
🔭 建議大家可以用專業嘅太陽濾片或者喺望遠鏡加裝濾鏡，再去觀測太陽。但記住留意要冇缺口先好用！又或者最安全嘅方法係以投影法，將太陽透過針孔裝置投射落白紙（可以喺網上搜尋投影法或者pinhole method）。
錯過咗今次嘅話，下一次喺香港見到嘅日食就要等到下年六月廿一號喇！嗰次都係日環食嚟，但同樣地香港只係見到日偏食。 希望大家都可以成功睇日食啦；）
📷 最後特別鳴謝本會會員暨第四十六屆幹事會選舉候選內閣「寂曉」學術 Nissen Lam 提供日食相片。該次日食為2017年8月21日之日全食，相片於美國俄勒岡州撒冷市(Salem)拍攝。
#不是選舉廣告
（注意返相片內嘅係日全食所以睇落好壯觀，但聽日香港見到嘅只係日偏食啊 xd）
Photo Credit：Nissen Lam, Hong kong observatory
撰文：Tiffany Pang