Categories
天文知識

19/20 第二期 指星筆知多少🔭🌌

指星筆係一支射激光上個天度嘅laser pointer。我哋會用佢嚟指示星星嘅位置,又或者畫出星座俾其他觀星嘅人睇到邊粒星打邊粒星。

🔦 點解要用指星筆而唔用手指呢?

你去過睇星就會知,喺冇指星筆嘅情況之下,其實好難話俾隔籬嗰個聽你睇緊邊粒星。例如,你只能夠話「嗰pat呢,紅色嗰粒星嗰邊有個三角形叉出去變Y字形,右手邊有pat濛濛地好似有8粒星咁呢…」(大家留言估下講緊咩天體?)、又或者「近排嗰度有粒好光嘅星,側邊有粒紅紅哋嘅星叉出去一點三點四點位置各有一粒星,向下同左下位置有一排星,成條J咁呢…」(又喺留言估下講緊咩星座,同好光嗰粒星係咩嚟?)。

但喺有指星筆嘅情況之下,我哋就可以隨時攞嚟指住講緊嘅星體同連起啲星畫出星座。

🔦 用指星筆有咩要注意㗎?

1. 唔好射到眼
2. 唔好射到飛機,會照到機艙,影響飛行安全
3. 好喺其他人影星嘅時候射上天(所謂阻人影星燒…報紙)
4. 指星筆唔係攻擊性武器

🔦 除咗指星之外 laser pointer仲有咩用㗎?

仲可以好似尋星鏡咁,幫助望遠鏡快速搵到要搵嘅天體。只要將指星筆痴住個望遠鏡,調較支望遠鏡嘅角度到支laser指住想睇嘅天體,再微調就可以了。

又或者做presentation嘅時候可以攞嚟指下個powerpoint咁囉。

(其實仲可以攞嚟同貓玩😻!!但可唔可以同狗玩就唔清楚了,據聞啲狗狗好驚俾laser射到~)

🔦 點解我見啲指星筆多數都係綠色嘅?

因為護眼。講笑///// (:好笑~)

因為紅色波長較長射上天度唔係好覺眼,而藍色紫色又會能量太高妨礙睇星,綠色亦都喺星體入面比較少見,所以多數都會用綠色。

Photo Credit:Alice Lau
撰文:Tiffany Pang

發佈回覆